Tey ta Ayotzinapa ji k´ot jun tsatsal milel xchapanoj ti ajvalile

Ta ska´k’alil 26, 27 yu´un septiembre ta sjabilal 2014, jchanunetik tey ta Ayotzinapa, Guerrero la spasik jun xanbal, ta jun o’ontonal, sventa tsk’anik chapanel ta sventa yich’ik milbel chib xchi’ilik ta yabilal 2012, xchi’uk tsk’anik ak’o lekubuk ti xchanubvunike, xchi’uk lekuk ti chanvunal chich’ike.

Pero ti peserente ta Iguala ta yosilal Guerreroe xchi’uk ti ajvalil ta estaroe, mu’yuk bu lek iyilik ti k’usi tsk’anik ti keremetike, jech la stak ta milel ti keremetike, iyich’ik ak’bel tuk’. Ti jmilvanejetike ja’ik polisiaetike te ta municipio yu’un Iguala, xchi’uy oy jayibuk jmilvanejetik xpixanoj satik.

Ti bu lajik ta milel ti keremetike, te nopol oy ti soltaroetike, pero, mu’yuk bu ipojvanik k´alaluk la skanik koltael ti jchanunetike jech la yich´ik pak’tael ta j-elek´etik, laj yich´ik pojbel celularik xchi’uk la jyichi´ik albel ti stotikuk oe o lok’ ta sa’el yu’unik ti milele.
Jech ti uts´intael, milel ji staike ji chamik 6 krixchanoetik, 25 ti bu tuch´em komemike xchi’uk 43 jchanunetik ti bu ch´ayemike. Ti yepal ti bu ch´ayemike yich´ojik 17, 20 sjabilalik, nakato chlikik xchanel sventa ch-ochik ta jchanumtasvanej ta slumalik.

Ti chopol ajvaliletike, la jyalik ti k´usi ji k´ot ta pasele ja’ la ya’mtel “jtsop j-elek’etik, jmilvanejetik”, pe lek xvinal ti ja’ jun milel la spas ti ajvalile, ja’ jun tsatsal milel ti ven chopol, ven k’ux ta stojolal ti jchi’el jk’opejel li’ ta banamile.

Jech no´ox tok, jun kerem ti bu la smilike, la jyuts´intaik, la yilbajinik; la slok´esbeik sbek’ sat.

Li milel k´ot ta stojolik ti jchanunetike, ji nik xa skotol yu’un ti yosilal Mejikoe. Likemik jchanunetik, chanumtasvanejetik xchi’uk skotol antsetik, viniketik. Jech no’oxtok likemik ta a’vanel ta xanbal ti vinik antsetik ta namal balumil.

Ti milel k’ot ta stojolik ti jchanunetike ta Ayotzinapae, mu jk’antik ti mu’yuk chich’ chapanele, jech noxtok ti yantik mileletik k’otemil ta sjunul Mejikoe, ak’o yich’ chapanel ek’ xtok.

¡¡¡KUXUL LA JYIK´IKBAEL, KUXUL TA JK´ANKUTIK SUTIKTALEL!!!